ثلاثة خطوط مترو إلى الملوخية
يمر المضمحِلُّ أمامي، يحتاج إلى الجميع ولا يحتاج إلى أحد.
يستطيع المضمحِل أن يشرح لك كيف تستمتع بتجرع الهزيمة.
هل الخريف بداية الشتاء أم نهاية الصيف؟!
نشرة الأخبار: قتلى + خطابات.
ـ عمي الشيخ عمي الشيخ بان كي مون جعد يقلق بعد التقاعد زاد يا عمي
ـ طمّنه يا حمود.. قول له كلنا رح نموت
ـ كلنا على هالطريق يا عمي.
دعونا نودِّع العالم بشكل لائق.
ـ كيف أوروبا معك؟!
ـ أخدنا إقامة ومشي حالنا
ـ سياسي؟!
ـ لأ إنساني
ـ ذكّرني بموقفك وقتها شو كان؟!
ـ من الإقامة؟!
ـ لا من الثورة
ـ قرَّبت .. شو بنا !!
ـ هلأ أنت كنت من جماعة قرَّبِتْ؟!
ـ لكان شو مفكر؟!
ـ والله ما بعرف .. بس وقتها كنت حاسبك على جماعة ألله يفرِّج
ـ لا بقى فرد مرة احسبني كنت على جماعة ألله يطفيها بنوره!!
ـ ههههههههه إي بيضلوا أحسن من جماعة حوالينا وما علينا
ـ لتكون منهن؟!
ـ لا والله أنا كنت من جماعة بكرة أحلى
ـ تفاءلتلك بفرنكين يعني
ـ هيك شي
ـ وهلأ شو موقفك؟!
ـ هلأ ماشي.. ما في مواقف
ـ ماشي لوين؟!
ـ عاليوم التاني
ـ أنا سابقك معناها
ـ ليش وين صرت؟!
ـ صرت باليوم اللي بعد التاني
ـ معناها أنت من جماعة الحرب الكونية
ـ لا والله من جماعة الحنين إلى المكدوس
ـ ادلك على سوبر ماركت عنده ملوخية؟!
ـ سمعت قال في واحد بغرونوبل
ـ إي وفي بمرسيليا كمان
ـ ليش بباريس ما في؟!
ـ في.. بس بدك تستخدم تلات خطوط مترو لتوصل له.
ـ جبنة شلل لقينا بالسوبر ماركت التركي
ـ إي وفي جبنة مسنرة اكعاب كمان
ـ شنكليش لقيت؟!
ـ إي بس طري شوي
ـ زيت الزيتون الأسباني أحسن الشي
ـ والإيطالي كمان مو حاكي شي
ـ مطولين بالوقفة؟!
ـ كمان شوي.. بس ليضبضبوا جماعة الكونغو اغراضهن
ـ أجوا قبلنا بكتير هدول
ـ إي صار لهن زمان واقفين
ـ هاد العلم ألك؟!
ـ لا والله وزعوا لي اياه
ـ بدك ترجعلهن اياه؟!
ـ إذا طلبوه
ـ وإذا ما طلبوه؟!
ـ ما بعرف..
ـ طيب قوم اسألهن مشان نروح
ـ لوين؟!
ـ عالقهوة
ـ طيب .. ثواني
ـ .....
ـ شرِّف معلم..
ـ أخدوه؟!
ـ إي.. بس على مضض
ـ اضمحلينا يا زلمة
ـ بونجوغ مسيو
ـ بونجوغ.. دو كافيه سيلفو بليه