كاتب سوري
بدك تصير كاتب هي كتير صعبة، بس إذا كاتب سوري فهي من أسهل ما يكون. أحسن من القعدة بالبيت.
جرب انتصر ع حالك شي نهار، دبحت الطغاة وأنت وعم تنتصر عليهن.
يا زلمة طلعوا هدوليك العاقلين اللي كنت أمشي معهن هنن رفاق السوء.
ـ هلأ بلا مسخرة.. بدك تعلمني اصير كاتب سوري والا لأ؟!
ـ أنت جاي على بالك يعني؟
ـ إي.. طالما فيها رزقة.. ليش لأ؟
ـ معناها شوف الدنية أول الشي من قفاك
ـ ما أنا هيك شايفها بالأساس
ـ روح لكان شايفلك.. أمورك بالسليم. بس لا تنسى تعزمنا على حفل التوقيع.
ـ مستحيل.. بس بمعيتك بدي تعلمني ع توقيع محروف شوي.
ـ اسمك توقيع بس خطّطه منيح وخليه يبين عفوي.
ـ والصور؟!
ـ متل التوقيع.. صورني وأنا اتأمل آلام الوطن ومو منتبه.
ـ مو منتبه لآلام الوطن؟!
ـ لأ بالعكس منتبه كتير.. بس مو منتبه للكاميرا.
ـ صعبة شغلة الكاتب السوري
ـ لا سهلة كتير.. المهم تتفاعل مع الأحداث
ـ ومع مين اوقف؟!
ـ مع اللعبة الحلوة.
ـ وفريقي؟!
ـ أنت فريقك
ـ والثورة
ـ كلمة بتهدر فيها لما بتلزمك لايكات
ـ وما بدك اياني احاسب المتخاذلين؟!
ـ حاسب تُعرَف.
ـ بس هيك رح ينشهروا
ـ وهو المطلوب
ـ يعني أفتحلها
ـ بالحجم اللي ما بيخليك تنفتح
ـ شي بيفتح
ـ إي بدك تتحمل
ـ عادي هيك كان وضعي من قبل بس على بلوشي
ـ لأ هون ما في شي ببلاش
ـ كترة المواقف بتفشخ يا زلمة
ـ معك معك بتتعود
ـ وبلكي أدمنت؟!
ـ بيرشحوك لشي جائزة
ـ حلوة الجوائز مصاري وشهرة وإلقاء كلمة
ـ ألذ الشي إلقاء الكلمة
ـ إي فيها تلذذ أكتر الشي
ـ ولسه النقاش عالعشا مع الداعين والمدعوين أحلى
ـ أممممممم ما في أحلى من النقاش عالعشا وحواليك شي عشرين تلاتين واحد عم ياكلوا ويشربوا ويمدحوك
ـ ما هي العزيمة على شرفك ما تنسى
ـ التعن شرفنا يا زلمة
ـ لا تحكي بصيغة الجمع قدامي.. لا ياخدك الحال.
ـ ماشي
ـ بخاطرك
ـ مع السلامة... ليك إذا ما بعتتلك دعوة على حفل توقيع كتابي لا تزعل.. بيكون نسيت.
ـ بالعكس بتكون فضَّلت
ـ أحلى أبو شريك
ـ ههههههههههههههههههههههه هي كمان غلط
ـ ليش يا زلمة
ـ أنت كاتب.. أنت فريد.. أنت وحدك.. أنت وغيرك لا لا.. أنت وبس والباقي خس.. بس المهم يكون في شي على راسك
ـ طاقية مثلاً أو عكال؟!
ـ لا لا.. هي مجرد أزياء.. خليك ماشي تحت ظلال الزيزفون.