الأربعاء
2016/09/28
آخر تحديث: 15:27 (بيروت)
بدون
الأربعاء
2016/09/28
حجم الخط
عليك أن تتعلم الكثير من فنون التقشف يا أيها النفر. عليك أن تشرب القهوة بدون سيكارة. مو مشان شي. مشان صحتك. بعدين توفير. بتعرف الدخان بأوروبا بيهدّ الحيل.
بيرة بدون تدخين. شاي بدون سكر. عرق بدون تلج. قصة حب بدونِك. جنة بدون ناس.
عيد بدون أهل. سهرة بدون أصدقاء. عطلة بدون عائلة.
ـ لغة بدون دراسة. لو بيعطوك اياها مع الإقامة بيكون ممتاز. بتعرف أهم شي اللغة. لك آاااخ بس لو كان معي لغة. لكنت فلحت أوروبا فلاحة. يلعن أخت الفرصة. ما بتجي إلا متأخرة.
ـ بسيطة روح افلح بالمدرسة مبدئياً. وإذا فلحت معناها خرجك تفلح بأوروبا. بتتذكر فالح فلوح؟!
ـ قاري اسمه بشي كتاب من تبعات المدرسة.
ـ منيح لساتك متذكر المدرسة.
ـ الأسى ما بينتسى يا أبو شريك.
ـ أنا نسيت حليب أمي.
ـ أنا نسيت النيدو.
ـ أنت من جيل النيدو؟!
ـ لكان بنعجبك.. نحنا اللي ساوينا البودرة حليب.
ـ وهنن اللي ساووا الحليب بودرة.
ذلك الضجيج الغريب حولي لم يعلمني اللغة حتى.
ـ حمووود ليش تتنفس وتتنهد لما تسحب سحبة السيكارة يا حمود؟!
ـ لأنها اللحظة الوحيدة اللي أتنفس بيها يا عمي.
عندما تعود إلى هناك لن يكون هناك ما يكفي من الأعداء لأجل سهرات العتابا .. يا يابا.
ـ سجل يا حمود: الحرية أن يعيش كل شخص كما يشاء.
ـ تبدأ حريتك عندما تنتهي مسؤولية الآخرين يا عمي.
ـ دمرت المقولة يا حمود!
ـ ما بي شي غير قابل للتدمير يا عمي.
عندما تسرق القداحة ليس مهماً أن لا ينتبه صاحبها. المهم أن لا تنتبه أنت.
الخبز والملح صفحة أخرى مُهانة من كتاب الأخلاق الممزق.
منعونا من كتابة القصص والأشعار وصناعة المسرحيات والأفلام عن الحياة. وها هم يسمحون لنا بأن نصنع كل ذلك لكن عن الموت.
عم احاول أتأقلم. بدي أعرف مين هو عصمت رشيد تبع فرنسا. ومين هي سهام ابراهيم تبعهن. بس عبث. طلع ما في منهن هدول بكل الدنية. ما قدَّرنا النعمة اللي كنا فيها.
ـ سجل يا حمود: انكتبلنا عمر جديد.
ـ واش رح نعمل بيه يا عمي؟!
ـ ذلك هو السؤال يا حمود.
صار بدنا فرمتة.
ـ بابا بدّي..
ـ هسسس
ـ بدّي..
ـ هي بدّي بدَّك تنساها بابا
ـ ما بدّي
ـ لأ بدَّك
ـ مو قلتلي أنساها من شوي!
ـ لشو ؟!
ـ لكلمة بدّي
ـ إي بدَّك تنساها.
ـ إي ما بدّي
ـ إي لأ بدَّك.. بالصرماية بدَّك.
الآن أدركتُ سر ابتسامة أمي بعد أن أضحى الحزن شريكاً في كل شيء.
حجم الخط
تابعنا عبر مواقع التواصل الإجتماعي
إشترك في النشرة الإخبارية ليصلك كل جديد
اشترك معنا في نشرة المدن الدورية لتبقى على اتصال دائم بالحدث
التعليقات
التعليقات المنشورة تعبر عن آراء أصحابها