وصلنا.. ولكن لن نصل

النفر هون مزعوج من صوت البراد. أحياناً لما بتوقف الموسيقى من موبايله الذكي اللي بيكون حاطط ميكس حزين أخو أخته لـ الياس خضر وباقي الشباب الطيبة. ميكس يعني.. فؤاد سالم على حميد منصور.. كوكتيل عراقي على كيفك أبو شريك، هلأ بس يعرف حدا من دعاة الوحدة العربية بهالموضوع أنو النفر سوري بس موسيقته عراقية، بيقوم بيطرقنا خطاب طنان بيبكي أكتر من ياس خضر بمليون مرة. بتصير بتقله إي والله معك حق، بالسلمية ومصياف بيسمعوا عراقي وطبعاً بالرقة وبالدير والحسكة..

بس هاد النفر السوري تحديداً اللي هلأ عم يسمع عراقي ومزعوج باللحظة اللي وقف فيها الصوت بداعي التبديل بين أغنيتين، كل وحدة منهن بتهد جبل وبتفتح بالصخور أنفاق ألها أول بس ما لها آخر.. هاد النفر تحديداً كردي .. سوري.. بقى سوري منَّك ههههههههههههه...

المهم ما لك بالطويلة.. كان عم يحكي عالواتس مع نفر داخلي بيحب الموت بس عايش لأنو أحول.. كلما بينزل برميل بيركض لعنده بيطلع رايح بالإتجاه الغلط، وما بيموت. ومع الأيام يا أبو شريك صار شيخ طريقة ومذهب. صارت العالم كلها تركض وراه، بس بشرط أنو يردوا وراه جملته المعهودة بهيك حالات. حالات نزول البرميل المتفجر الحبيب.. الغالي.. يا غالي..

مكلف الدولة هديك الحسبة من المصاري، وكله مشان خدمتك، تحقيق مرادك، تفعيل شغفك، وإضفاء الإثارة والسوسبينز لنهايتك. انت لست عادياً، أنت الذي سيصنعون عنه القصص والروايات والمسرحيات والأفلام. أنت تمتلك كل المواصفات. أنت ذلك الغامض الباقي على قيد الحياة في جهنم الحمراء، وأمامك يا حقير باكيت حمراء. يا حيف. ابعتلنا كروز أبو شريك. ابعتلنا كروز. إي لعيونك أحلى كروز.

شلون هولندا معك؟ قال الحشيش بالشوارع، إي لكان حرية معلم، ورواق، ما حدا بيتدخل فيك، بنوب. لا خيراً ولا شراً. الجماعة بتحسهن خالصين من مرحلة الحياة. يمكن عم يعيشوا بمرحلة تانية متقدمة ما عم نقدر نفهمها أو نعرف شو أسمها. وباعتبار الجماعة واصلين، فأنا قررت أنو نوصل نحنا كمان.

بس بيناتنا، لا تقول لحدا، ما رح نوصل يا أبو شريك. مع أننا كنفرات واصلين كلنا، شاؤوا أم أبوا، بوليس موليس خفر مفر ما بيهم. جدار هنغاريا العظيم، كمان ما بيهم. عياره بنسا ومفك براغي كاشف للوجود الكهربائي.. تورنفيز يعني بالكردي، إي مو بالكردي هي، هي بالفرنسي يمكن. المهم ما لك بالطويلة نحنا بنقدر نوصل لأوروبا، بس مستحيل نقدر نوصل للعالم اللي وصلوا له وليش مستحيل يا مستطيل؟! شو ما دريت بحياتك أنو الشعوب تنهض من رمادها كطائر الفينيق؟!

ههههههههههههههههه هالحكي بتحكيه بالمخفر. حاكم حزب البعث بيعمل خاطر للقوميين السوريين وللشيوعيين وللإسلاميين كمان. بقى بيجوز يفيدوك هالكلمتين، لكن نحنا هربانين من هالكلمتين قبل الهريبة من المخفر. ووصلنا معلم وصلنا. بس بحياتنا ما رح نوصل.. ومتل ما بتعرف.. النفر مزعوج كتير من صوت البراد.