آخر تحديث:16:46(بيروت)
الخميس 13/02/2020
share

مدير فرع بنك بيبلوس: "بكل بساطة ما عندي دولار.."

المدن - مجتمع | الخميس 13/02/2020
شارك المقال :
مدير فرع بنك بيبلوس: "بكل بساطة ما عندي دولار.." تتعامل المصارف مع المواطنين على أن أموالهم غير موجودة وذهبت أدراج الرياح (Getty)
تتوالى قصص المواطنين اللبنانيين ومعاناتهم مع المصارف، التي باتت فارغة من الأموال، وتتحجج بمختلف الذرائع لمنع المودعين من الحصول على أموالهم. لكن ما حصل مع المواطن حكمت الأمين من رد تلقاه من مدير بنك بيبلوس في بدارو، يشي أن المصارف باتت تتعامل مع المواطنين على أن أموالهم غير موجودة وذهبت أدراج الرياح. إذ أن مدير المصرف رفض حتى تحويل حفنة بسيطة من الأموال إلى الخارج لأخته، التي تدرس في إيطاليا، قائلاً له "جبولي مصاري (كاش) لحولكن"، ما يعني أن الأموال في الحساب باتت متبخرة.
وبعد أخذ ورد مع مدير البنك لم يتمكن الأمين من فعل شيء. ما دفعه لكتابة ما حصل معه اليوم الخميس في 13 شباط على صفحته الفيسبوكية نورد النص من دون أي تدخل في التحرير: 

"رحت اليوم انا والوالدة على بنك بيبلوس بدارو لنحوّل 1500 يورو اجار البيت لنور بايطاليا محل ما عم تدرس، من حساب نور (الدولار) بهيدا البنك بموجب وكالة عملتها نور لماما. 
اول ما فتنا بيسألنا موظف شو عندكن؟ قلنالوا بدنا نحول لبرا، كان دغري جوابه: ما عم نحول لبرا.
بعد ما قعدنا واخد رقم الحساب والوكالة وعقد الاجار، صار كل شوي بده يطلع بخبرية، ساعة انه ما بتزبط، ساعة انه وين مكتوب بالوكالة انه فيكي تحولي؟ سكت بس عطيناه وصل تحويل سابق بنفس الوكالة. ساعة صار بده يجرب يتزاكا، انه ليه ما بتسحبيهن $200 بالاسبوع. بعد جدال طويل قبل يقدم الطلب وبقلنا انه 99 % رح تنرفض. 
هون طلبت منه يخبر مدير الفرع انه يا بتنقبل التحويلة يا بدنا نجي ناخد المبلغ كاش، كامل وبالدولار. فكان رد الموظف: انا ما فيي قله هيك للمدير، اذا بتحب خبره انت.

وصل المدير المحترم، عدناله الخبرية وقلته عندك هل حلين. فكان رد المدير، انا ما فيي اعملك شي وما عم تحضر اخبار؟ في 1200 مليون بدهن يندفعوا، يا خدوهن بالليرة يا جبولي مصاري لحولكن.
بعد ما قلتله الموضوع مش مشكلتي، ومش انا الي جمدت مصرياتي واخدت فايدة، وانت عليك تمشي التحويلة او تعطيني ياهن كاش، وما تقنعني انك مدير بنك ما فيك تأمن هيك مبلغ صغير ولا لناس وناس بتزبط؟

انزعج المحترم من حديثي، بقوم بقلي: هيدا خبار اللبنانية كلنا منعرفها ومنعرف من وين بتجي. انا بقانون مصرف لبنان بحقلي اعطيك المصاري بالليرة اللبنانية على السعر الرسمي.
-الرد: لكان ازا عم تحكي قانون، فرجيني ايا قانون سامحلك تعمل كابتل كونترول؟
-انا مش عامل كابتل كونترول، بكل بساطة ما عندي دولار، خدهن لبناني. بعدين انت شو خصك، مش انت صاحب العلاقة. انا رح قدم الطلب الي 90 % رح ينرفض وغير هيك ما فيي اعمل شي. يا خدوهن لبناني يا روح تظاهر. 
انتهى الحديث هون وانا وضاهر سألته: دخلك ليش بعد ما ركبت حديد؟
-ما رح ركب انا ما بخاف من حدا!

بعمري ما كسّرت ولا رح كسر، بس بعتقد الي بتسمحله نفسه انه يذل العالم بمصرياتها صار وقت انه يخاف".


شارك المقال :

التعليقات

التعليقات المنشورة تعبر عن آراء أصحابها