مصابةٌ بالسرطان تدعو أمثالها لتصدّر صفوف التظاهرات الأمامية

ما بعرف كيف فيني ساعد. بس لازم ساعد. أنا مصابة بالسرطان. ولازم ندعي كل (المصابين/المصابات) بالسرطان، (لأقول) ما في شي ممكن نخسروا (بعد). فينا نتعاون ونكون بالصف الأمامي قدام كل ولادنا. فينا نعمل شي. فينا نحمي ولادنا. ما عنا شي نخسروا، وولادنا شباب عم ينزلوا (إلى التظاهرات). ونحنا لازم نكون بالصفوف الأمامية بينهم وبين الجيش. بيضربنا الجيش منحميهم (لأولادنا). بيضربوا الجيش منحمي الجيش. نحنا لازم نكون بالصفوف الأمامية. أنا بكون أول وحدي، وبينزلوا معي كل مرضى السرطان من نساء ورجال. إللي بيقدروا وللي بيأيدو الثورة، وبيقبلوا ياخذوا ها الموقف، نحنا مستعدين.

بتمنى نكون كتار، لأن نحنا المصابين بالسرطان كتار كتار. ولادنا حرام يعيشوا ببلد مش نظيف، وبلا كرامة. نحنا إذا متنا مش مهم. المهم هني يعيشوا. بدنا نعمل شيل لولادنا. فبتمنى ينعمل شي مبادرة على هذا الصعيد، ونتجمع نحنا مرضى السرطان نساء ورجال. النساء بالصف الأمامي والرجال ورائا.

بتمنى تردوا عليّ خبر تا نجتمع ونشوف قديش في مؤيدين (لهذه) المبادرة، وننزل من قلبنا كثوار، بلكي بتتحرك أمهات الباقيين وينزلوا ورانا ويساعدونا.

إذا في مين بيقبل بهيدا الجهاد، أنا بكون أول وحدة. وإذا بيكون شي بينفع فليكن. الله يرضى عليكم ويقويكم. أنا ولادي مسافرين. أنا بكون محل ولادي. إللي ولادن بلبنان لازم ينزلوا ليحموا ولادن. إذا ممكن نلاقي عدد كبير مبادرين، لازم ندعي لاجتماع لنشوف كيف ننسق بكل المناطق بلبنان.