باسيل يستعيد 14 آذار والقانون الأرثوذكسي.. ولا ينسى "النازحين"

اختتم التيار الوطني الحرّ مؤتمره السنوي، بعد ثلاثة أيام من الأنشطة، بدأت مساء الجمعة في العشاء التمويلي في فندق الحبتور، فيما استكمل السبت بحوار شبابي مع رئيس التيار جبران باسيل، واختتم الأحد بالمؤتمر التنظيمي، والذي أطلق باسيل بعد انتهائه جملة من المواقف السياسية. معتبراً أن لبنان الكيان والوطن والدولة النموذج والرسالة بخطر، ووجودنا كلنا كلبنانيين في خطر أيضاً، إذا استمرينا متمترسين بمواجهة بعضنا.

.. إلى 14 آذار؟!
وقال باسيل: "نحنا منبقى 14 آذار لمّا الكل بينسوه، لأنّو الحريّة والسيادة والاستقلال مزروعين بجيناتنا الوطنية، ولأنّو التحرير ما بيكمل إلاّ بتحرّر اللبنانيين ودولتهم من ثنائية الفساد والتسلّط". وأشار إلى أنه "هذه السنة الأسئلة وجوديّة، والخيارات بتتعلّق بالمصير، بتتعلّق بالجمهورية وبقائها، والانهيار المتسارع بيفرض نلاقي حلول مش توصيف للمشاكل. نحنا بالتيار منملك الطرح ولكن ما منملك الحل لوحدنا. الطرح بيقدر يكون فردي أما الحل ما بيكون إلاّ جماعي".

ورأى باسيل أن "لبنان الكيان والوطن والدولة والنموذج والرسالة بخطر، ووجودنا كلنا كلبنانين بخطر اذا استمرّينا متمترسين بمواجهة بعضنا ورافضين الحوار كطريق للخلاص. بلبنان ما في أغلبيّة نيابية لفريق لوحده، وما رح تكون ولا يوم. مجبورين نتحاور ونتّفق، ولازم نطلع من تخوين بعضنا لأن ما في حل إلاّ بالاتفاق". وأضاف: "بديل الحوار هو العنف، وحتى العنف بيخلص بالحوار. إلاّ إذا واحد فكره يقضي على التاني، وما فيها جماعة بلبنان تفني جماعة تانية".

وعصب التيار ورياض سلامة
وشدد على أن "عصب التيار عم يقوى اكتر، بقضيّته ومبادئه. يلّي خايفين تجي الحلول على حسابنا، ويمشوا بالـDeal بلانا بقلّن ان محاولة عزل التيار أحسن وصفة لتقويته، ولكن نتيجتها عاطلة عالوطن، لأن بناء الدولة رح يفشل من دوننا. هيك، منرجع على المعارضة الواضحة بالكامل، وهيك بتخدمونا!". وقال: "معركة الاصلاح إلزامية ومش ترف سياسي. لأن نحنا جماعة ما منقدر نعيش الاّ ضمن الدولة. الفساد والدولة ما بيتعايشوا، في واحد بيقضي على التاني".

من جهة أخرى، أشار إلى أن "جيلاً بكامله عم يربى على فكرة انّو واحد متل رياض سلامة مش معقول يتحاكم او يتوقّف، متلما بإيامنا سيطرت فكرة انّو مش معقول يتحرّر لبنان. شباب لبنان اليوم فاقدين الأمل، بوقتها نحنا ما فقدناه وتحرّر لبنان وطلاّبنا هلّق ما رح يفقدوه ورح يتحاكم الحاكم، جرائم حاكم مصرف لبنان متواصلة وتعاميمه سرقة يومية مكشوفة وموصوفة مع عدّة أسعار للدولار لاستكمال سرقة أموال المودعين."

القانون الأرثوذكسي واللامركزية
من جهة أخرى، أكد باسيل أن "وقف العدّ لا يكون بالكلام والتهويل بـ19.5%، بل بالقانون الأرثوذكسي بمجلس النواب، وبمجلس الشيوخ وبالدولة المدنيّة وبإلغاء الطائفية بالكامل، وبقيام اللامركزية الموسّعة وبإلغاء مرسوم تجنيس 94 وبتنفيذ قانون استعادة الجنسية وبعدم دخول سوريين غير نازحين، وبعودة النازحين".

وتابع باسيل :"حكّام الصدفة رايحين ونحنا باقيين، النازحين واللاجئين بيرجعوا عَ بلادن ونحنا منبقى ببلادنا. "حتّى نبقى، لازم يرجعوا".
ولفت باسيل الى "اننا نريد للبنان أفضل العلاقات مع دول العالم وخصوصًا مع الدول العربية وتحديداً الخليجية ولكن نرفض أي شي يسيء لوجودنا".

من جهة اخرى، اعتبر باسيل انهم يريدون رئيسًا مجرّدًا من أي برنامج وفكر وشعب رئيس "بيرجّع ساعة البلد بدل ما يقدّم ساعة الاصلاح فيه" وأريد أن أقول لهم "إجت الساعة قد ما ترجعوها لوَرا".

وتابع :"انا مرشّح طبيعي ومنطقيّ كوني رئيس التيار صاحب أكبر كتلة نيابية ولم أترشّح كي لا أكون سبب الفراغ وقمنا بتنازلٍ كبيرٍ للحل الكبير ففسّروا موقفنا المسهّل كأنه ضعف وشنّوا علينا حملة وقاموا برهانات خاطئة على شرذمة التيار وتفكيكه".
واضاف :"حزب الله اكّد لي مراراً انّه من المستحيل ان يطرح أحدًا او يقبل بأحدٍ لا أقبل انا فيه وعندما سألت "اذا تأمّن 65 صوت لسليمان فرنجية بتمشوا فيه بدوننا؟" حزنوا وأتى الجواب مرّات عدّة على كلّ المستويات انّه "كيف تسمح لنفسك ان حتى تفكّر بالأمر؟".

وفي ختام كلمته، دعا باسيل شباب التيار إلى الاستعداد للشارع للهتاف سوياً: "مبارح وبكرا ومن زمان نحنا السيادة بلبنان، اليوم وبكرا ومن زمان نحنا الكرامة بلبنان، مبارح واليوم وبكرا تيار ووطني وحرّ".