أفغاني شخصي

من أول كانت الأخبار بالنسبة ألك ثقافة للإطلاع وحفظ المعلومات وسردها في المجالس الثقافية، حتى كان في واحد سوري تاجر لانجيري قاعد مع مثقفين يساريين قال أنو بضاعته وصلت للإتحاد السوفياتي السابق، السابق من عنده، وبلغاريا ورومانيا وأفغانستان بشقيها شاه مسعود وطالبان، بس بالنتيجة هم أفغانستان ما كان ياكل معك ولا ذرة مشاعر. يعني عادي، شي ما بتنتميله، مو من عشيرتك، وبيضل كل مشهد عم تشوفه من هنيك عالتلفزيون مجرد أخبار. 

ـ يقولون

ـ شو يقولون؟!

ـ يقولون

ـ تقول اقوالهن انشالله 

ـ هههههههههههههههههه أحسن الشي الواحد ما يشوف أخبار. بينتزع مساه. 

ـ بدك تقنعني أنك متضايق مشان أفغانستان ومو جاي ع بالك تسهر؟

ـ لا مو لهالدرجة.. بس يعني تعكر مزاجي شوي

ـ إي روق.. هلأ بس تشوف كاس العرق اللي عم يزهزه بقلبه التلج بتنسى.

ـ هههههههههههههههههههه إي روقنا.. تاكسي!

ـ العداد معطل والله يا شباب.. بأديش بالعادة بتطلعوا بهالمشوار؟!

ـ  بصوت واحد: بخمسة وعشرين

ـ إي تفضلوا بخمسين تكرم عينكن

ـ بصوت واحد: فضلت يا غالي

التاكسي ينطلق إلى عالم النسيان.

طال صمتك يا صاحبي

حتى تحول إلى أنين.

عرفت بقى شو وضعه النفر الحزين؟! لا تشكيلي ببكيلك، شو أبكيلك ما أبكيلك، قول أَنهارُ لك أيما انهيار، واصير كومة احجار قدامك لا تسمع ولا تتكلم وغير صالحة للإستعمال، حتى لأعمال الشر والشجار، إي، لأنو بالحقيقة مو احجار هنن، بوالين على شكل احجار، وأنت بتعرف كيف لما بتضرب واحد بالبالون، أول شي ما في تحكم بالضربة أبداً لأنو البالون غير خاضع لقانون جاذبيتك، وبالتالي بيروح وين ما بده.

فهيك وضعنا يا أخي الشاكي مع تحيات أخوك الباكي سلفاً على كل وضعك وكل مآسيك، من وقت ما تعرفت عليك حسيت نحوك بهالمشاعر، بس ما حكيت مشان ما افتحه لجرحك وأنت تقعد كل السهرة تكابر. 

أخي ابكي شو عليه، خلص افتح قلبك، أنا متلك سوري، يعني بفهم عليك، عالطاير بفهم عليك، بس أكذب عليك واقلك بعرف أفغاني لا والله. أكتر شي بعرفه هو شاه مسعود وطالبان والرئيس اللي نسيت اسمه قرضاي، وغير هيك بعرف أنها فلا وبراري على مد النظر وجبال وتلج وشوب والذي منه، بس ما شفت بنايات، ولا بيوت، بيجوز ما عندكن كثافة سكانية متلنا، وبعرف الشادور هاد بيجي متل البرقع، والنسوان بيمشوا ورا الرجال، إي وشو كمان؟!

إي كمان بعرف نكتة أفغانية قال وحدة أفغانية قالوا لها جماعة حقوق المرأة انو لا تمشي ورا جوزك، قام قالتلهن في بالطريق ألغام. ههههههههههه. حلوة؟! عجبتك؟! صحيح عالسيرة أنت مع حقوق المرأة والا مع الشادور؟! ما عندكن متلنا حل وسط؟! إشارب؟!

نحنا عنا نسوان بلا إشارب، والمحجبات عنا يعني بيلبسوا إشارب، ونصهن ملونين، هلا ما عاد حدا يستخدم إشارب أسود أو أبيض، كله صار ملون، أحمر أصفر أخضر بنفسجي موف أورانج مشكل مشجر مزهر شو ما بدك.