ـ كل الحق عالإستعمار
ـ الإستحمار أنت الصادق
ـ إي راح الإستعمار وتركلنا الإستحمار
ـ ولسه بتقلي مو مؤامرة
ـ لك حتى المؤامرة كرهونا فيها
ـ متل ما كرهونا بالأزمة
ـ ثورة يا حمار
ـ رجعنا عالاستحمار.
ـ بس شو بدك بالحكي كانت أيام
ـ كنا عايشين
ـ بفضل الفساد
ـ دخيل رب الفساد
ـ شو بدك بالحكي حلو الفساد
ـ تدمرنا هون بدون فساد
ـ إي هون مو مين من كان بيقدر يستفيد من الفساد
ـ العمى عنّا الفساد كان للجميع
ـ إي لكان كنا عايشين.
ـ عن جد كنا عايشين
ـ شو شايفك تمدمدت بمدح الفساد
ـ إي شو بدك أحلى من أنو تحل الشكليات بشوية مصريات!
ـ شوي تانية رح تخليني أبكي عاللي فات
ـ إي مو مشكلة طالما أنو كان مثير للإعجاب
ـ تكركبنا كأنو
ـ إي ما في نفر مو مكركب
ـ من عدا المثقفين
ـ هدوليك عندهن دكاكين.
ـ صاير لما بدي اشوف نفر عم أتوضى باللبن
ـ من عند التركي؟!
ـ شو هو؟!
ـ اللبن
ـ إي من عند السوبر ماركت التركي
ـ أحمر والا أزرق؟!
ـ على حسب.
ـ حاكيني عن الفساد.. مشتاق
ـ عن جد أنت لشو بتشتاق باعتبارك نفر بالمنفر؟!
ـ بلاها المقابلات الصحافية
ـ لا مو مقابلة.. لشو مشتاق؟!
ـ للفساد
ـ أمممممم
ـ رواق
ـ إي يفضح عرضه شو رواق
ـ فيه اعتراف
ـ اعتراف؟!
ـ إي أكبر إعتراف
ـ بالمصاري كل شي بيصير
ـ كل شي بحقه
ـ شو ديته؟!
ـ أهم شي
ـ فساد
ـ إي حلو الفساد
ـ إي بس بيحسسك انك ما حصلت ع شي بعرق جبينك
ـ وبنفس الوقت بتحس انك حصلت ع كل شي بعرق جبينك
ـ إي حسب من وين أجوك المصريات
ـ من مصراتا
ـ ارهابي
ـ وازي العيال؟!
ـ من مصر قصدك؟!
ـ إي اسق الله لما كان في مصر
ـ وأهرامات
ـ خوفو خفرع منقرع.
ـ الثلاثي المرح
ـ ما عم نقدر نتأقلم هون
ـ الفساد هون غير مباشر
ـ مو مأمَّن يعني؟!
ـ لناس وناس
ـ العمى عالتفرقة
ـ فرق عملة.
ـ صار كيلو الخيار بالويل
ـ لك منيح في خيار، هون الخيارة بطول عصاية الأستاذ.
ـ شفت مشمشة هون بقد الرمانة
ـ وشفت رمانة بقد الجبسة
ـ تعلمنا عالمترو ونسينا المكرو
ـ شفنا مطارات أكتر من كل شي شفناه من قبل بحياتنا من مطارات بشي خمس مرات.
ـ رح امرِّق قدامك شوية صور مشان أفحص ذاكرتك الوطنية وشعورك القومي.
ـ هاد بياع فروج مشوي
ـ أين يقع محله؟!
ـ بشارع العرب ببرلين
ـ طيب وهي الصورة؟!
ـ هاد محل حلويات عربية
ـ أين يقع؟!
ـ بلندن
ـ طيب وهي الصورة؟!
ـ محل حلاوة جبن حموية؟!
ـ أين يقع؟!
ـ بباريس
ـ طيب وهي الصورة؟!
ـ قلعة حلب
ـ أين تقع؟!
ـ بغازي عنتاب.
حوار على ظهر الحمار
لقمان ديركيالأربعاء 2017/06/14
رسم تصويري لبرايان ستوفير
حجم الخط
مشاركة عبر
التعليقات
التعليقات المنشورة تعبر عن آراء أصحابها