اشتباك ريما وغسان الرحباني مع مهرجانات بعلبك

لم تمر حفلة "صوت الصمود" في بعلبك من دون تصاعد بعض الأصوات المعترضة، خصوصاً الجيل الثاني من أبناء "الرحابنة" (ريما وغسان...). فالحفلة قدمت نحو 20 دقيقة من الموسيقى والغناء، لمقطوعات منتقاة من مسرحية "أيام فخر الدين" للأخوين رحباني وفيروز، أعدها أوركسترالياً، غدي وأسامة الرحباني خصيصاً لهذه الحفلة. ولم يأت الاختيار اعتباطيا، بل بالتزامن مع مئوية تأسيس لبنان الكبير، مع ما يعنيه فخر الدين في "تاريخ لبنان".

ولم تكد تمر ساعات على تقديم الحفلة في معبد باخوس في بعلبك، حتى أصدرت ريما الرحباني (ابنة فيروز وعاصي) بياناً اعتراضياً على مهرجانات بعلبك وأولاد عمها منصور (أسامة وغدي) فقالت فيه بالعامية: "لجنة ولدنات بعلبك، دخلكن الاخوين مش تنين؟ ما فهمت أنا إذا بدكن تعيدوا أي عمل من أعمالن... أولاً، مش لازم تاخدوا إذن من التنين؟ وخاصة إنّو من سنتين او تلاتة رحلكن إنذار بهالخصوص؟ وإلا نسيتو؟ تانياً، لما تاخدوا عمل تتعيدوه، الأصول تعيدوه بصيغته الأصلية المشرّفة إلكن ولغيركن، وأكتر بكتير واللي كرمالا انتو عم تعيدوه، والا كيف؟ انو شو بها الموسيقى الأصلية تينعاد توزيعا؟ وسلّمنا جدلاً انّو حابين ينعاد توزيعا، مع اني انا ضد ميّة بالميّة ودايما انا مع الأصليّة، هيك عمل في شي اسمو إذن اولاً لإعادة التوزيع، وفي مسؤولية وفي قيّمين آخرين أولى يوزّعوا ويشيروا ويبدوا رأين هاي مسؤولية كبيرة ما بيقرّرها مين ما كان. تالتاً لما بدكن تستعملوا صور لفيروز مش لازم تستأذنوها؟ رابعاً، مش لازم يكون عندكن الحد الأدنى من اللياقة وتعرفوا حجم كل اسم قديه بيكون؟ لأنو الحجم إلو علاقة بالفعل بلا معلميّة يعني. خامساً، صح النوم مش للأخوين؟ وما مرقت عندكن بال٢٠٠٦؟".

وتابعت ريما: "سادساً، ما فهمنا شو خص المتنبي وكيف سلحب ع الأخوين؟ هيدا كان لازم يمرق فرداوي اذا شي، متل البقيّة، وإلا قصدكن إعتراف انّو من الأساس ملطوش من الاخوين؟ سابعاً، مش كان لازم تستشيرونا بإختيار العمل وفقاً للمناسبة؟ انا يمكن كنت فضّلت جبال الصوان على فخر الدين، مؤاتية للوضع أكتر خاصة وإنّو كل الشعب إستشهد ع البوابة من الجوع والسرقة والفحش والبطر تبعكن وتبع الحكّام اللي فوقكن! اللي خرّب البلد هنّي امثالكن اللي بيِنهَبوا الدولة ومال الدولة لتمويل هيك مشاريع ومن جيوب الناس، هنّي وفاتك الدولة، والفاتك بالدولة، وطبعاً فاتك بالجمع يعني فواتك الدولة.. إي ما بعرف شو قصدكن بفخر الدين بهالمرحلة بالذات وهوّي الدين بالذات اللي قضى ع فخرنا وعلينا مش كورونا والا شفتو الغرب هيك عمل نسختوه لأن هيدا اللي شاطرين فيه النسخ! ثامناً، ما فهمنا ليه نينا سيمون وأم كلثوم و و و و بيمرقوا سيدا، وفيروز بتمرق يتبع؟ أيّ عبقري فيكن ابتدع هالشي؟ تاسعاً، الشحادة ع بعلبك مش من شِيَم الأخوين ولا من شِيَم فيروز. عاشراً، مجد بعلبك عملوه فيروز ونصري وصباح ووديع وهدى وملحم بركات وايلي شويري... مش إنتو اللي عملتوه واكيد مش هونيك جوقة مش عارفة المِنجَيرة من المهَيرة يه يه يه، والا بيّي راح اللي طالعة متل فريرو جاكو! والله عيب! الله يرحم مي عريضة!".