فهمانين النفرات غلط

المهم مالكن بالطويلة يا أبو شريك. أنو نزلنا تسلاية تبع نفرات مع ماما ميركل. قام طشت فيها الصحافة. وما أدراك ما الصحافة. عَ الحمير اللي عنَّا ما كنت أقدر أعمل مقياس. بس بعد ما عبرنالِك عن محبتنا بشكل هزلي بحت. وفي أهزل من أنو نشبهك ببشار الأسد. وبجمهور بشار الأسد؟!!!

أكتر من هيك مسخرة ما في. والنفرات روح قلبهن المسخرة. ما حدا بيقدر يمنعهن عن ذلك. ومع ذلك هالغزلان تبع الصحافة العالمية استلقوها خبر. يا لطيف. السوريون يعبِّرون عن محبتهم لميركل. أنو بدهن يقولوا أنو السوريين شعب منافق. هدول الصحافة العالمية. أما الصحافة المنحبكجية المحلية المتدثرة برداء الحرية. فبتقدم النفرات كمخالفين للقوانين. ومنافقين. ونصابين. وحرامية. وفي شي أذكى من شي.

بس المتسابقين كلهن غزلان. صحافة غزلان. إعلام غزلان. وعم يقود المنطقة. وأي منطقة. منطقة الكذب. منطقة السرقة. منطقة السلبطة. منطقة القتل الحلال. قتل عَ الطريقة الأوروبية. قتل عَ الطريقة الأميركية. قتل عالطريقة الإستشراقية الداعشية. قتل عَ الطريقة البعثية الجحاشية. ونفس الشي فيما يخص المذلة. باعتباره الموت ولا المذلة. يعني لو بدنا ننذل كنا متنا.

نسيت اقلِّك أنو جايينك من ثورة. مو هربانين منها. بس هربانين من الموت اللي مسلطينه على هالثورة. وبالبلم جيناكم. وبلا اتفاقية. بس ع أساس الحق الكذاب لورا الباب. وأنا لاحقك. لاحق الديمقراطية. ولاحق الحرية. مع أنو ثورتنا ثورة كرامة. بعدين ارتأوا العلماء أنو لأ. هي ثورة حرية.

طيب.. بس بعد اللي صار برأيك عاد في قيمة لحرية الآراء؟!! حرية النشر. إي شو بدي بالنشر؟! أنا نفر. ما بدي أطلع بالتلفزيون. بس بدي انتشر. بنتشر وين ما بدي. عم أدفع للمهرب. وعم أشتري معه الطريق. ما بدي مفوضية لاجئين. ولا أنجيلينا جولي. ولا حتى الأم تيريزا.

بس الماما ميركل وضعها مختلف. ما لها من نوع الأعمال الخيرية التي يكرهها النفر. النفر لا يحب الأعمال الخيرية. النفر مغامر مقامر مجنون لا ينتظر المستقبلين على أرصفة المحطات. النفر بيغادر عاللسي. وبيفوت عاللسي. له طرائقه. ومعه زوادته. ما معه فيزا كارد. بس بيملك الويسترن يونيون.

الويسترن يونيون من أملاك النفر. لولاه بيسكِّر. وأنتِ جايي يا آنستي النمساوية تستقبليه بمحطة القطار وبإيدك سندويشة. ههههههههههههههههه؟!  انشالله مفكرة أنو النفر رح يهجم عالسندويشة وياكل أصابيعِك وراها؟!! صَدَّقتِ صور الإعلام القندرة لما بدُّه يظهر نفسه تاج راسنا.

لا.. نحنا ما حدا تاج راسنا. نحنا بلا تاج. نحنا نفرات خلعنا التاج. ولحقنا الكذاب لورا الباب. وما بنحب حدا. مخنا مو فاضي لهيك شغلات. حبينا نتسلى مع أم النفرات ماما ميركل لأنو تصرفت تصرف رجولي معنا بخصوص بصمة دبلن. وبس. ما بدنا مستقبلين. وما بدنا وجبات. بدنا نوصل عاللسي لبلاد فيها حقوق إنسان.. ونصفن لردح من الزمان. 


يتبع.. من حديث نفرات