يا نفرات العالم تفرَّقوا

يا نفرات العالم تفرَّقوا. فإن لم شملكم بعيد المنال. والإنتظار صعب. فبعد وصولك عزيزي النفر إلى أرض الميعاد أوروبا عليك الإنتظار لمدة عام أو أكثر لكي تأخذ الإقامة. وبالطبع يتخلل هذا العام كل أصناف التوتر والقلق. وفي النهاية ستنال الإقامة وستكتب جملتك الشهيرة على الفيسبوك: باركولي.. وأخيراً أخدت الإقامة. أو ستبقى معلقاً ومهدداً بالطرد إلى تركيا على الأرجح في حال عدم نيلك الإقامة. يعني كل المصاري اللي دفعتهن للمهرب راحوا بوش.

لكن خلينا بفرضية أنك أخدت الإقامة بعد سنة. وبلشت بمعاملة لم الشمل. لم شملك يعني مع أطافيلك وعيلتك. اللي رح يكونوا إما تحت سقف الوطن عايشين بسبب الحظ. أو بدول الجوار. وإذا تيسرت أمورك وأمور العيلة وما طلع شي ولد من اولادك إرهابي. وما طلعت مرتك مطلوبة للأنتربول الدولي فَ..رَح يكونوا عندك بعد سنة.

يعني سنتين وأحياناً أكتر لحتى ينلمّ شملك مع عائلتك الكريمة. وبسنتين مو بس بني آدم بيتغير. بتتغير أوطان. بتنمحى بلدان. وبيجوز اولادك ما يوصلوك كاملين. وبيجوز مرتك أول ما توصل تقول لك: طلقني. وبيجوز أنت ترمي على مرتك الطلاق وأنت وعم تستقبلها بالمطار.

بقى اقتصروا يا نفراتنا وتفرقوا. انتشروا. هيك وهيك رح تتفرقوا. هيك وهيك اولادك رح يحلوا عنك بس يصيروا فوق ال 18. بقى تفرَّقوا. خاصة وأنو الإجتماع مع أي نفر ما بيجيب غير النكد. يعني شو بدك تحكي معه. بده يجيبلك سيرة معاملته المعصلجة وبيته اللي تدمَّر. وأهله اللي ماتوا نصهن. وأنت رح ترد له بنفس الحديث تقريباً. رح تزعل عليه. ورح يزعل عليك. ورح تقضوها زعل بزعل.

بقى بلالك هالقعدة من أولها. خاصةً أنو هيك نوع من القعدات بتأخرك عن تعلم اللغة. يعني لما بتشوف حدا تحكي معه بلغتك رح تتكاسل بطلب العلم. ورح تقول لحالك ليش لأتعلم لغة؟! ماني مجبور. عندي معارف ورفقات بيحكوا بلغتي بقى شو بدي بدروس اللغة؟! لذلك بلالك هالجمعات مع النفرات. هلأ حتى القعدة  مع النفرات اللي من غير بلاد ما لك مصلحة فيها إلا من باب الإطلاع على مآسي الآخرين. بس بعدين رح تمل.

يعني صار النكد  أكبر من الهم عالقلب. لك الهم صار أكبر من الهم عالقلب. حياتك صارت هموم. وأنت صرت هَمّ. واولادك صاروا هَمّ. ورفقاتك صاروا هَمّ. ومرتك صارت هَمّ . وجوزِك صار هَمّ . وأمك صارت هَمّ . وأبوك صار هَمّ . وأخوك صار هَمّ . وأختك صارت هَمّ . وبلدك صارت هَمّ الهموم. وفوق اللي منها رح تلتقي مع نفر اليوم. يعني رح تلتقي مع باقة من الهموم. ما في نفر بدون هموم. هي شغلة أنو نفر فرايحي بدون هموم اغسل إيدك منها. بقى اقتصر يا نفر. وغض البصر. وكول بصل وانسى اللي حصل. ويا نفرات العالم تفرَّقوا.. قد ما فيكن تفرَّقوا.