نصف قرن من النباح

يا أخي لا تحاول. ما بتعرف تكتب. مو شغلتك الكتابة. مهما كانت آراءك قوية، ومشبعة بالقضية، فبالنتيجة مالك فكاهة ولا مازية. 

زمن أول تحول. زمن اللي كانت فيه النصف (لا) مهمة راح. هلأ إذا بدك تقول (لا ونص) ما رح يمشي حالك فيه. لو بتعمل حالك شهيد ما رح تصير كاتب. لو بتسب عالأسد ما رح يمشي حالك. لو بتتطاول عالواحد الأحد ما رح يمشي حالك. لو بتبلع كتب ماركس ولينين ما رح يمشي حالك. لو بتبلع المصحف وأنت وعم تحلف يمين ما رح يمشي حالك. لو بتوقف مع الثورة ما رح يمشي حالك. ولو بتوقف مع النظام ما رح يمشي حالك. ولو بتوقف مع النص نص ما رح يمشي حالك. 

ألله عفاك من الموهبة. وعالم الكتابة.. كل يوم بيقلك أنو حل عن اكتاف الورقة. اترك القلم بحاله. حاج تبعبص بازرار اللاب توب. ما رح تصير كاتب. والسبب بسيط. أنو هي الثورة انتصرت. انتصرت على خمسين سنة قهر. انتصرت على خمسين سنة كذب. انتصرت على خمسين سنة من الثقافة الفاشلة المأجورة الكذابة. انتصرت عليك. وعلى أمثالك. لكن ما قدرت تفرض نصرها لأنو الكلمة بالنهاية حالياً للسلاح. 

وأنت فيك تصير كاتب بقوة السلاح. بس ما رح تصير كاتب. حتى لو وقف وراك مليون عسكري. حتى لو فرضك عشرين نظام. حتى لو زكاك خمسين فصيل. حتى لو احتضنتك سبعين جريدة. سقطت مرحلتك. بس أنت لساتك عم بتلبعط بهالمستنقع. 

نشفت المجاري اللي عم تسبح فيها. والغلاصم الثورجية والزعانف الممانعة ما عاد تنفعك لتكمل الغطس والغوص. أنت الآن عار في صحراء. قلمك المسكين يئن بين أصابعك طالباً الخلاص. ودفترك يلعن الساعة التي تركك تستفرد به. 

لقد انتهت مدة صلاحيتك. اليسار الذي كان يفرض اسمك سقط وصار مسخرة الأجيال. واليمين الذي كان يعطيك الهيبة صار مكشوف متل الأعور الدجال. أما الإنسانية اللي عم تتلحف فيها هلأ فصار يتضَّحك عليها الحيوان. 

ارحم حالك. ارحم قلمك منك. ارحم دفترك. ارحم شاحن لابتوبك. وحل عن هالكار بقى. خبزتك فيك تاخدها من مليون كار. ورزقتك موجودة عند الغني الجبار. بس حل عن هالكار. كار مو كارك بيخرب ديارك. هيك بيقولوا العوام. وباعتبارك بتحب العوام. متل ما بتقول بكتاباتك. فلازم تسمع كلام العوام. وتحل عن هالكار. لأنو مو كارك. 

قرينالك من اليمين لليسار. ومن اليسار لليمين. ومن فوق لتحت. ومن تحت لفوق. يا أخي ما رح تصير كاتب. ما في مجال. الشغلة مو بالزور. فيك تقول رأيك. فيك تنطق بمكنوناتك. فيك تعبر عن مشاعرك. بس لا تتصور وأنت وعم تسند دقنك بإيدك. لا تاخد وضعية الكاتب مفكراً. عن جد شكلك مسخرة. خاصة بعد ما انتهت مدتك اللي طولت خمسين عام. 

انتهى عصر النباح.