بلا تفجير

ـ كيف أيامك؟!

ـ مو أيامي

ـ وين أراضيكْ؟!

ـ لا تراضيني

تعالوا كي لا نلتقي، تعالوا لا نرتب المواعيد، تعالوا نتحاشى الصدف. 

قال قاعدين يعملوا أشكال مرعبة بعيد الهالووين اللي سمعت فيه أول مرة بفلم لمصطفى العقاد اسمه "هالووين"، نفسه اللي عمل "الرسالة" و"عمر المختار". المهم حسيت أنو ما حدا عم يرتعب. فكَّرت أنو لو شي واحد (ملتحي) بس يفوت بنص الحفلة ويصرخ (ألله أكبر). شو كان رح يصير.. بدون تفجير؟!!

زعلان عليهن كتير، كل شي عملوه وما خوَّفوا حدا.

لماذا تضحك زوجتي على نكتتي السخيفة؟!!

زوجتي تجاملني... أنا أيضاً أجاملها.

التفسير: حاولتُ أن أجامل زوجتي فلم أجد شيئاً سوى نكتة سخيفة قديمة تافهة فرميتها وكانت المفاجأة أن ضحكتها الشديدة المتفانية المتلقفة للنكتة القديمة لم تفاجئني. 

ما أجمل الخط (ا) ن المتوازي (ا) ن اللذان لا يلتقيان.

ما أجمل اللقاء، ما ألطف الفراق.

ـ حياة بتهوي يا أبو شريك، كل لحظة بتقعد بتحس أنو بعد لحظة رح تسمع خبر بيهوِّي، حياة بتهوِّي.

ـ حياتك ولا شي قدام الحياة اللي بتهوِّي عن جد. يعني تخيَّل كلما فكَّرت تضحك بتتذكَّر أنك عايش لحظة بتهوِّي. لأ ولسه لما بتفكِّر تبكي مشان غيرك بتتذكَّر أنك عايش حياة بتهوّي ومو لقيان وجع غيرك، ولما بتحس أنو وضع العالم بيهوِّي بتتذكَّر أنو أنت اللي وضعك كمان بيهوِّي، شو رأيك بقى بالحياة اللي بتهوِّي؟! 

اللي من قد ما بتهوِّي بتهرب قد ما فيك من اللي وضعهن متل وضعك بيهوّي، وبتهرب قد ما فيك أكتر من اللي وضعهن ما بيهوّي؟! بقى شو في أكتر من هيك شي بيهوّي؟!

ـ أنك تقعد كل لحظة وتحس أنو بعد لحظة رح تسمع خبر بيهوّي. 

كشخصين يجلسان إلى بار، أحدهما أنتِ، وأنا الآخر، ما المعنى من الذكرى؟!!

حلو الفن بغض النظر عن السوق.

حلو السوق بغض النظر عن الفن.

شخص ما قد تعرفه يموت الآن، شخص ما قد تعرفه يحتضر الآن. شخص ما قد تعرفه لا يجد من يضمد جرحه الآن. شخص ما قد تعرفه يشعر بالرعب الآن. شخص ما قد تعرفه يتم القبض عليه الآن. شخص ما قد تعرفه يموت تحت التعذيب الآن. شخص ما قد تعرفه يساعد أحداً الآن. شخص ما قد تعرفه يبكي على أحد الآن. شخص ما قد تعرفه يكتب قصيدة سخيفة الآن. شخص ما قد تعرفه يقبض ثمن مقالة الآن. شخص ما قد تعرفه ينظم تنديداً الآن. شخص ما قد تعرفه يصور فيلما وثائقياً الآن. شخص ما قد تعرفه يغرق الآن. شخص ما قد تعرفه يحصل على الإقامة الآن. شخص ما قد تعرفه ينتحر في الغربة الآن. شخص ما قد تعرفه يتزوج الآن. شخص ما قد تعرفه يطلب التعرف عليك الآن، شخص ما قد تعرفه.